أرحم م الرصيف كلمات الشاعرة المبدعة- مرفت جابر -مصر

أرحم م الرصيف
كلمات مرفت جابر 
من ديوان خليك انسان 
................... 
لو نسيت كل اللي عدّى
واللي كان فعلا ما بنّا
أو نسيت لحظات وعودك
إن تبقى الدنيا جنّه
واللا حتى وقوفي جنبك
واحتمالي ف كل محنه
مش مهم دا كله خالص
إنسى لو بتحب تنسى
بس إيه خلاك بتقسى
حتى ع الورد الصُغيّر
دانت كان عمرك ما تقدر
تبتعد لو لحظه عنهم
عملوا إيه أو إيه ذنوبهم
لجل ترميهم بإيدك
حتى من غير انتظار

إفتكر كلمة يا بابا
إللي كانت صوت جيتار
وافتكر ضحكة وشوشهم
إللي بتجيب النهار
هان عليك نصبح ف نار
وانت رافض يوم تحن
صوت قلوب الورد أن
والعذاب شايفاه بعيني
بس غصبن عنّي ساكته
داب معاك حبل المودّه
واللا دنيا جديده خطفت
قلبك اللي ما عادش لينا
كنت رُبّان السفينه
سيبتنا والموج غريق
ذنبه إيه الورد البرئ
واللا حتى ذنبي إيه ؟

عيشت عمر بحاله صاينه
بيتنا وباحافظ عليه
واحتملت ليالي جوعي
وانت عارف قد إيه
كنت وانت معاك بتبخل
عمري حتى ما قولت ليه
بس يرضيك ورد روحنا
ينطفي العطر اللي فيه
واللا يرضيك تلقى وردك
ف الطريق مادد إيديه ؟
قوللي كان الذنب إيه
وان لقيت اللوم عليّا
لومني لوم وادبحني حتى
حتلاقيني صابره ساكته
بس وحياة المودّه
إللي كانت يوم ف قلبك

إفتكر كل اللي عدّى
واحنا زي الورد جنبك

وافتكر كلمة يا بابا
مهما كان دول حتّه منّك
وافتكرلي انشالله حاجه
ربما تشفعلي عندك
م الشوارع لم لحمك
واقسى واحنا معاك براحتك
دي القسيّه لو ف حضنك
برضه أرحم ألف مرّه
من سنان ..
برد الرصيف
............

كلمات  الشاعرة /مرفت جابر/ مصر...................