"أمي" .. حسن عمران
أيوه يامه لسه فاكرك.. لسه فاكر كل شكلك.. كل طقاطيعك ..ملامحك. حتي قولك.. حتي همسك.. حتي إيديكي ولمسك.. لسه فاكر ضحك سنك.. كل كلمه خدوها منك.. حتي صورتك في بطاقتك ..وكل أكلة وفيها نفسك..لسه فاكر يامه توبك..حتي جلابيتك وروبك..حتي ماشيك في دروبك ..حتي تسريحتك كلامك..حتي أحلامك منامك..حتي إيدك في سلامك..خفة الدم ف كلامك..رعشتك وانتي بتحكي.. عن ألم زود ألامك.. أيوه والله عايشة في.. في دمعتي وفرحة عنيّه.. ولسه شايفك قاعدة جنبي.. ساكنه في ضميري وقلبي.. ولسه عارف ..لسه شايف.. لو في يوم حبيت أخبي.. راح تطول النظرة في.. وطالتك تكشف عنيّه.. تكشفي كل اللي بي.. م انتي أم ومش عادية.. وتعرفي حالي ف سلامي.. وتمسكي حالي ف إيديّه.. أيوه يامه لسه عاشقك.. عاشق القسوة ف ضربك.. لما أغلط أولساني.. ينطق العيبه وهمك.. ينشغل ويعيد يزيد.. والقي وشك رغم طيبته..أصبح الوش الحديد.. ينقلب حالي وكياني..وافضل الأيام بعاني..في إنتظار رضاكي عني.. لجل يصالحني زماني.. أيوه والله مانسيتك.. واسألي حييك وبيتك.. شوفي كام مرة بعدي..وشوفي كام مرة هديتك.. ألف رحمة وألف نور.. واسألي قبرك يقولك.. كم هديتك من زهور.. كل زهرة تحكي حالي.. ودمعتي وسط الليالي.. م انا من غيرك ولا اسوي.. لا رخيص ولا حتي غالي ..نفسي اشوفك مرة واحدة..ياللي فايتاني في وحدة..ورغم إن الدنيا زحمة !!..بس مابتيجي ف بالي.. هي بعدك ليها قيمة؟!..غيرها دنية ناس أليمة؟!.. م انتي عيشتيها وعارفة..إمتي شوفتيه سليمة؟!..
ألف رحمة..وألف نور. #عيد الأم #٢١/ ٣/٢٠١٨
ألف رحمة..وألف نور. #عيد الأم #٢١/ ٣/٢٠١٨
ليست هناك تعليقات:
إرسال تعليق