..من الديوان الثاني..
..للشاعرعبدالرحمن حجاب. ..
،،،،،،،،،
....حكمة الصيد ...
يا صيادين السمك صــيد السمك غِيَّه
نفسي أدوق السمك لو حتى بلطيه
من بعد نوِّة مطر وف وقت عصريه
سوق الصياده جَبَر وادَّاني بــوريه
** الرزق واحد يا صاحبي ويحب خِفِّيه **
شِدْ الشراع يا عمر جهِّز قوام مجداف
دا البحر موِّج خطر إرمي ميتين حداف
والبوري جَيْ يمِّنا نزِّل بقَى الخطَّــــاف
وارمي الشبك ف الوَسَع لِمُّه واوْعى تخاف
** دا اللي يبعزق غموسه ياما هـ يا كل حاف **
يملا الشبك مُرجان أو يوم يجيب حبَّار
الموزه ويَّا دنيس والجمبري ووقــــــــار
إوعى تخاف تعبــــــان أو قرش يا سنار
دي الصياديه تقول ما ياكلني غير بحار
** والشاطر الغزَّال يغزل برجـــل حمـــار **
نفرش شبكنا يجيب التونه والبربــــون
والحمــــــد لك ربنا رازق دا كل الكـــون
يخلق بشر من عدم ويقول له كن فيكون
يرزق ديدان ف الحجر والحوت بلع ذا النون
** واللي بينوي الخير ربك يكون في العون **
ــــــــــــــــــــــــــــــــــــــــــــــــــــــــ
ليست هناك تعليقات:
إرسال تعليق